 |
ശബരിമല തീർത്ഥാടന കാലത്തെ തിരക്ക് ശാസ്ത്രീയമായി കൈകാര്യം ചെയ്യുന്നതിനായി ആധുനിക സാങ്കേതികവിദ്യയായ നിർമിത ബുദ്ധി (എഐ) ഉപയോഗിക്കാൻ തിരുവിതാംകൂർ ദേവസ്വം ബോർഡ് തീരുമാനിച്ചു. വരാനിരിക്കുന്ന മണ്ഡലകാലം മുതൽ ഈ സംവിധാനം നടപ്പിലാക്കുമെന്ന് തിരുവിതാംകൂർ ദേവസ്വം ബോർഡ് പ്രസിഡന്റ് കെ. ജയകുമാർ വ്യക്തമാക്കി. പദ്ധതിക്കാവശ്യമായ കരാർ നടപടികൾ ഓഗസ്റ്റ് 15നകം പൂർത്തിയാക്കാനാണ് അധികൃതരുടെ നീക്കം.
ഈ സാങ്കേതികവിദ്യയുമായി ബന്ധപ്പെട്ട അവതരണങ്ങൾ എഐ രംഗത്തെ പ്രമുഖരായ മൂന്ന് കമ്പനികൾ ദേവസ്വം ബോർഡ്, പോലീസ് ഉദ്യോഗസ്ഥർ എന്നിവർക്ക് മുൻപാകെ നടത്തിയിട്ടുണ്ട്. പരീക്ഷണാടിസ്ഥാനത്തിൽ ഈ സീസണിൽ നടപ്പിലാക്കുന്ന പദ്ധതി, അനുഭവങ്ങളുടെ അടിസ്ഥാനത്തിൽ തുടർന്ന് കൂടുതൽ കാര്യക്ഷമമാക്കും.
കേന്ദ്രീകൃത കൺട്രോൾ റൂം വഴി നിലയ്ക്കൽ, പമ്പ, മരക്കൂട്ടം, സന്നിധാനം എന്നീ മേഖലകളിലെ ഭക്തജന പ്രവാഹം നിരീക്ഷിക്കാനും നിയന്ത്രിക്കാനുമാണ് എഐ സംവിധാനത്തിലൂടെ ലക്ഷ്യമിടുന്നത്. നിലവിലുള്ള വെർച്വൽ ക്യൂ സംവിധാനത്തെ പുതിയ സാങ്കേതികവിദ്യയുമായി സംയോജിപ്പിക്കും. തിരക്ക് മുൻകൂട്ടി മനസ്സിലാക്കുക, പാർക്കിങ് ക്രമീകരിക്കുക, വഴിതെറ്റുന്നവരെ കണ്ടെത്തുക, ഭക്തരുടെ ആരോഗ്യസ്ഥിതി നിരീക്ഷിക്കുക, മാലിന്യ നിർമാർജനം, ശുദ്ധജല വിതരണ സുരക്ഷ, മുന്നറിയിപ്പ് സന്ദേശങ്ങൾ നൽകുക തുടങ്ങിയ വിവിധ സേവനങ്ങൾ ഇതിലൂടെ സാധ്യമാകുമെന്ന് കെ. ജയകുമാർ പറഞ്ഞു.
പൂർണമായും ഓട്ടോമേറ്റഡ് ആയ സംവിധാനമാണ് ശബരിമലയിൽ വിഭാവനം ചെയ്യുന്നതെന്ന് വിജിലൻസ് ഡയറക്ടർ മനോജ് ഏബ്രഹാം വ്യക്തമാക്കി. ഇൻഫ്രാറെഡ് സെൻസറുകൾ, ഡ്രോൺ ക്യാമറകൾ എന്നിവയുടെ സഹായത്തോടെ സന്നിധാനത്തെ ജിപിഎസ് മാപ്പിംഗിന് കീഴിൽ കൊണ്ടുവരും. ഇത് തിരക്ക് നിയന്ത്രിക്കുന്നതിനൊപ്പം തന്നെ, വിന്യാസം നടത്തുന്ന പോലീസുകാരുടെ എണ്ണം കുറയ്ക്കുന്നതിനും സഹായിക്കും.
പദ്ധതിയുടെ വിശദമായ റിപ്പോർട്ട് തയാറാക്കുന്നതിനായി പത്തനംതിട്ട എസ്പി ആർ. ആനന്ദിനെ ചുമതലപ്പെടുത്തിയിട്ടുണ്ട്. ഈ റിപ്പോർട്ടിന്റെ അടിസ്ഥാനത്തിൽ താൽപര്യപത്രം ക്ഷണിക്കുകയും തുടർനടപടികളിലേക്ക് കടക്കുകയുമാണ് ചെയ്യുക. നിലവിൽ മണ്ഡല-മകരവിളക്ക് സീസണുകളിൽ പ്രതിദിനം ജോലി ചെയ്യുന്ന 6000 തൊഴിലാളികളുടെ എണ്ണം ഈ സംവിധാനം വരുന്നതോടെ ഗണ്യമായി കുറയ്ക്കാൻ കഴിയുമെന്നും കെ. ജയകുമാർ കൂട്ടിച്ചേർത്തു.
Original article: News Kerala
Labels: Health, Kerala, Main, Pathanamthitta, Tech News