 |
വെബ് ബ്രൗസർ വിപണിയിൽ ഗൂഗിൾ ക്രോം പുലർത്തുന്ന മേധാവിത്വത്തിന് വെല്ലുവിളിയുമായി ഒപെൻ എഐയുടെ ‘അറ്റ്ലസ്’ ബ്രൗസർ. 2026 മാർച്ചിയിൽ ഒപെൻ എഐ പ്രഖ്യാപിച്ച പദ്ധതി പ്രകാരം, തങ്ങളുടെ ഡെസ്ക്ടോപ്പ് ആപ്ലിക്കേഷനുകളെയും കോഡെക്സിനെയും ഉൾപ്പെടുത്തി അറ്റ്ലസ് എന്ന ഏകീകൃത വർക്ക്സ്പേസ് ആപ്ലിക്കേഷൻസ് ചീഫ് ഫിഡ്ജി സിമോയുടെ നേതൃത്വത്തിൽ വികസിപ്പിക്കാനാണ് കമ്പനി ലക്ഷ്യമിടുന്നത്.
ക്രോമിയം പ്രോജക്റ്റും ബ്ലിങ്ക് എൻജിനും അടിസ്ഥാനമാക്കിയാണ് അറ്റ്ലസ് പ്രവർത്തിക്കുന്നത്. ക്രോമിലെ ബുക്ക്മാർക്കുകൾ, പാസ്വേഡുകൾ, ബ്രൗസിംഗ് ഹിസ്റ്ററി, ക്രമീകരണങ്ങൾ എന്നിവ അറ്റ്ലസിലേക്ക് എളുപ്പത്തിൽ ഇറക്കുമതി ചെയ്യാൻ സാധിക്കും. എക്സ്റ്റൻഷനുകൾ കൈകാര്യം ചെയ്യാനുള്ള സൗകര്യവും ഇതിലുണ്ട്.
അറ്റ്ലസിന്റെ ഏറ്റവും ശ്രദ്ധേയമായ പ്രത്യേകത അതിലെ എഐ (AI) സാങ്കേതികവിദ്യയാണ്. നിലവിൽ സന്ദർശിക്കുന്ന വെബ് പേജിലെ വിവരങ്ങൾ വിശകലനം ചെയ്യാനും, ഇമെയിൽ ഡ്രാഫ്റ്റുകളിലും വെബ് ഫോമുകളിലും ഉള്ള ടെക്സ്റ്റുകൾ നേരിട്ട് തിരുത്തിയെഴുതാനും ഇതിലെ കർസർ ചാറ്റ് സൗകര്യം സഹായിക്കുന്നു.
ബ്രൗസറിലെ ‘ഏജന്റ് മോഡ്’ (Agent Mode) ആണ് മറ്റൊരു പ്രധാന സവിശേഷത. ഉപയോക്താക്കൾക്ക് പകരം വെബ് പേജുകളിലെ നിർദ്ദിഷ്ട ജോലികൾ ചെയ്യാൻ ഈ മോഡിന് സാധിക്കും. ഉദാഹരണത്തിന്, ഒരു ഉൽപ്പന്നം തിരയുന്നതിനും അത് കാർട്ടിൽ ചേർക്കുന്നതിനും ഏജന്റ് മോഡ് സഹായിക്കുന്നു. സുരക്ഷാ മുൻകരുതലിന്റെ ഭാഗമായി, പേയ്മെന്റ് പോലുള്ള നിർണ്ണായക നടപടികൾക്ക് ഉപയോക്താവിന്റെ അനുമതി അറ്റ്ലസ് ആവശ്യപ്പെടും. സാൻഡ്ബോക്സ് സാങ്കേതികവിദ്യയിൽ പ്രവർത്തിക്കുന്നതിനാൽ, ഇത് ഫയലുകൾ ഡൗൺലോഡ് ചെയ്യുകയോ സിസ്റ്റത്തിന്റെ സുരക്ഷയെ ബാധിക്കുകയോ ചെയ്യുന്നില്ല. പ്ലസ്, പ്രോ, ബിസിനസ്സ്, എന്റർപ്രൈസ്, എഡ്യൂക്കേഷൻ സബ്സ്ക്രിപ്ഷൻ ഉള്ളവർക്കാണ് ഈ സേവനം ലഭ്യമാകുക.
എങ്കിലും, വെബ്സൈറ്റുകളുടെ ഉള്ളടക്കം നേരിട്ട് വിശകലനം ചെയ്ത് നൽകുന്ന അറ്റ്ലസ് പോലുള്ള എഐ ബ്രൗസറുകൾ പ്രസാധകർക്ക് വെല്ലുവിളിയാകുമെന്ന ആശങ്കയും ഉയരുന്നുണ്ട്. നിലവിൽ ആപ്പിൾ സിലിക്കൺ മാക് (macOS 14.2 അല്ലെങ്കിൽ അതിനു മുകളിലുള്ളത്) ഉപയോക്താക്കൾക്ക് മാത്രമാണ് അറ്റ്ലസ് ലഭ്യമാകുന്നത്. വിൻഡോസ്, മൊബൈൽ പതിപ്പുകൾ ഉടൻ പുറത്തിറങ്ങുമെന്ന് കമ്പനി അറിയിച്ചിട്ടുണ്ട്. ക്രോമിന്റെ വിപുലമായ സേവനം ലഭ്യമല്ലാത്തത് അറ്റ്ലസിന് തൽക്കാലം തിരിച്ചടിയാണെങ്കിലും, ഭാവിയിൽ മികച്ചൊരു ബ്രൗസിംഗ് പകരക്കാരനായി ഇത് മാറാൻ സാധ്യതയുണ്ടെന്നാണ് പ്രാഥമിക വിലയിരുത്തൽ.
Original article: News Kerala
Labels: Kerala, Main, Tech News