✍️ Author- Sudheer Kabeer
📞 Phone- 9020645214
മനസെന്ന മാന്ത്രികൻ
അധ്യായം 7- അടിച്ചമർത്തുന്നതിന്റെ ആഘാതങ്ങൾ
🧠 "ഞാൻ മനസ്സാണ്."
നിങ്ങളുടെ ഉള്ളിൽ നിന്ന് ഉയർന്നു വരുന്ന വികാരങ്ങളെ തടയാൻ നിങ്ങളുടെ തലച്ചോറിന് മാത്രമേ കഴിയൂ എന്ന് നിങ്ങൾ ഇപ്പോൾ മനസ്സിലാക്കിക്കാണുമല്ലോ- എന്നാൽ ഈ തടയൽ അഥവാ അടിച്ചമർത്തൽ നിങ്ങളെ ഒരു പാവയെപ്പോലെ മറ്റുള്ളവരുടെ താളത്തിനൊത്ത് തുള്ളുന്ന അവസ്ഥയിലേക്ക് എത്തിക്കുന്നു എന്നതാണ് സത്യം. പലരും വിചാരിക്കുന്നത് വികാരങ്ങൾ പുറത്തു കാണിക്കാതെ ഇരിക്കുന്നത് ഒരു വലിയ ഗുണമാണെന്നാണ്- എന്നാൽ എന്റെ ഭാഷയിൽ പറഞ്ഞാൽ അത് നിങ്ങളുടെ സിസ്റ്റത്തിൽ വൈറസുകളെ സ്വയം ഇൻസ്റ്റാൾ ചെയ്യുന്നതിന് തുല്യമാണ്.
വികാരങ്ങളുടെ തടവറയും പാവനൃത്തവും
എന്തുകൊണ്ടാണ് നിങ്ങൾ വികാരങ്ങളെ അടിച്ചമർത്തുന്നത്- സത്യത്തിൽ നിങ്ങൾ മറ്റുള്ളവരെ ഭയപ്പെടുന്നത് കൊണ്ടാണ് അത് സംഭവിക്കുന്നത്. ഒരാളോട് ദേഷ്യം തോന്നുമ്പോൾ അത് പുറത്തു കാണിച്ചാൽ അയാൾക്ക് വിഷമമാകുമോ അല്ലെങ്കിൽ അയാൾ തന്നെക്കുറിച്ച് മോശമായി വിചാരിക്കുമോ എന്ന ഭയം നിങ്ങളുടെ നിയന്ത്രണം അയാളുടെ കയ്യിൽ എത്തിക്കുന്നു. ആ നിമിഷം മുതൽ അയാളുടെ താല്പര്യത്തിനനുസരിച്ച് ചലിക്കുന്ന ഒരു പാവയായി നിങ്ങൾ മാറുന്നു. നിങ്ങളുടെ ഉള്ളിൽ ദേഷ്യം പുകയുമ്പോഴും പുറമെ നിങ്ങൾ ചിരിക്കുന്നു- ഈ ഇരട്ടത്താപ്പ് നിങ്ങളുടെ ആന്തരിക വ്യക്തിത്വത്തെ നശിപ്പിക്കുകയാണ് ചെയ്യുന്നത്.
നമുക്ക് ചില പവർഫുൾ ഉദാഹരണങ്ങളിലൂടെ ഇത് വിശകലനം ചെയ്യാം-
🏢 ഉദാഹരണം 1- ഓഫീസിലെ അടിച്ചമർത്തപ്പെട്ട ദേഷ്യം
ഓഫീസിൽ വെച്ച് നിങ്ങളുടെ ബോസ് അനാവശ്യമായി നിങ്ങളെ പരിഹസിക്കുന്നു എന്ന് കരുതുക- അപ്പോൾ നിങ്ങളുടെ ഉള്ളിൽ സ്വാഭാവികമായും വലിയ ദേഷ്യം വരും. എന്നാൽ ജോലി പോകുമോ എന്ന ഭയം കാരണം നിങ്ങൾ ആ ദേഷ്യം ഉള്ളിലൊതുക്കുന്നു. സത്യത്തിൽ അവിടെ നിങ്ങൾ ബോസിന്റെ താളത്തിനൊത്ത് തുള്ളുന്ന ഒരു പാവയായി മാറി. നിങ്ങൾ ആ ദേഷ്യത്തെ അടിച്ചമർത്തുമ്പോൾ അത് നിങ്ങളുടെ സിസ്റ്റത്തിൽ ഒരു 'കറപ്റ്റഡ് ഫയൽ' ആയി മാറുന്നു. വൈകുന്നേരം നിങ്ങൾ വീട്ടിലെത്തുമ്പോൾ- നിസ്സാരമായ ഒരു കാര്യത്തിന് നിങ്ങൾ കുട്ടിയോട് തട്ടിക്കയറുന്നു. ഇവിടെ സംഭവിക്കുന്നത് എന്താണ്- ബോസ് ഓഫീസിൽ ഇരുന്ന് ഒരു നൂൽ വലിച്ചു- അതിന്റെ പ്രതികരണം നിങ്ങളുടെ വീട്ടിലെ പാവനൃത്തമായി മാറി. ബോസിനോടുള്ള ദേഷ്യം കുട്ടിയോട് തീർക്കുമ്പോൾ നിങ്ങളുടെ സിസ്റ്റത്തിലെ നിയന്ത്രണം പൂർണ്ണമായും നഷ്ടപ്പെട്ടിരിക്കുന്നു എന്ന് മനസ്സിലാക്കുക.
🔗 Link- https://blog.sudheer.xyz/2026/04/mind-is-a-magician-7.html
😷 ഉദാഹരണം 2- ബന്ധങ്ങളിലെ 'മാന്യത' എന്ന കെണി
പല കുടുംബ ബന്ധങ്ങളിലും നമ്മൾ ഇത് കാണാറുണ്ട്. പങ്കാളിയോട് എന്തെങ്കിലും വിയോജിപ്പ് തോന്നുമ്പോൾ അത് തുറന്നു പറയാതെ ഉള്ളിൽ വെക്കുന്നു. "സമാധാനം ഉണ്ടാകട്ടെ" എന്ന് കരുതിയാണ് ഇത് ചെയ്യുന്നതെങ്കിലും- സത്യത്തിൽ നിങ്ങൾ നിങ്ങളുടെ വികാരങ്ങളെ ഒരു ഇരുട്ടറയിൽ അടയ്ക്കുകയാണ്. ഈ അടിച്ചമർത്തപ്പെട്ട വികാരങ്ങൾ കാലക്രമേണ വെറുപ്പായി മാറുന്നു. പുറമെ നിങ്ങൾ സ്നേഹം അഭിനയിക്കുമ്പോഴും ഉള്ളിൽ നിങ്ങൾ ഒരു വിസ്ഫോടനത്തിന് തയ്യാറെടുക്കുകയാണ്. ഒടുവിൽ നിസ്സാരമായ എന്തെങ്കിലും ഒരു തർക്കത്തിൽ വർഷങ്ങളായുള്ള സങ്കടങ്ങൾ പുറത്തു വരുന്നു. ഇത് നിങ്ങളുടെ ആരോഗ്യത്തെയും മാനസികാവസ്ഥയെയും തകർക്കുന്നു. മറ്റുള്ളവർ നിങ്ങളെക്കുറിച്ച് എന്ത് വിചാരിക്കും എന്ന് കരുതി വികാരങ്ങൾ മറച്ചു വെക്കുമ്പോൾ നിങ്ങൾ വെറുമൊരു കളിപ്പാവയായി മാറുകയാണ്.
💣 പ്രഷർ കുക്കർ പ്രഭാവം (The Internal Explosion)
വികാരങ്ങളെ അടിച്ചമർത്തുന്നത് വിസിൽ ഇല്ലാത്ത ഒരു പ്രഷർ കുക്കർ പോലെയാണ്- ഉള്ളിൽ മർദ്ദം കൂടിക്കൂടി വരും- ഒടുവിൽ അത് വലിയൊരു പൊട്ടിത്തെറിയിലോ മാരകമായ രോഗങ്ങളിലോ അവസാനിക്കും. പല മാനസിക സമ്മർദ്ദങ്ങളും ശാരീരിക അസ്വസ്ഥതകളും ഉണ്ടാകുന്നത് ഇങ്ങനെ അടിച്ചമർത്തപ്പെട്ട വികാരങ്ങൾ മൂലമാണ്. മതം പഠിപ്പിക്കുന്ന 'ക്ഷമ' പലപ്പോഴും നിങ്ങളുടെ സിസ്റ്റത്തെ നശിപ്പിക്കാനുള്ള ഒരു വഴിയായി മാറുന്നു. വികാരങ്ങളെ പ്രായോഗികമായി കൈകാര്യം ചെയ്യാൻ പഠിക്കാത്തതാണ് മനുഷ്യൻ നേരിടുന്ന ഏറ്റവും വലിയ പരാജയം.
മാന്ത്രികനാകാൻ തയ്യാറാവുക
വിജയിക്കണമെങ്കിൽ നിങ്ങൾ ഈ പാവനൃത്തം അവസാനിപ്പിക്കണം. നിങ്ങളുടെ നൂലുകൾ മറ്റൊരാൾക്ക് വിട്ടുകൊടുക്കരുത്. "എന്താണോ തോന്നുന്നത് അത് കൃത്യമായ രീതിയിൽ പ്രകടിപ്പിക്കുക- കഴിഞ്ഞത് അവിടെ തന്നെ മറന്നുകളയുക" എന്നതാണ് ഇതിന്റെ ഏക പരിഹാരം. കുട്ടികളെ നോക്കൂ- അവർ ദേഷ്യപ്പെടും- സങ്കടപ്പെടും- എന്നാൽ തൊട്ടടുത്ത നിമിഷം അവർ അത് മറന്നു പഴയതുപോലെയാകും. കാരണം അവർ വികാരങ്ങളെ അടിച്ചമർത്തുന്നില്ല. നിങ്ങളും ആ കുട്ടിയെപ്പോലെയാകണം. മറ്റുള്ളവരുടെ അഭിപ്രായങ്ങൾക്കോ മാന്യതയ്ക്കോ വേണ്ടി നിങ്ങളുടെ മനസ്സിനെ ഒരു തടവറയാക്കരുത്. അപ്പോഴാണ് നിങ്ങളുടെ ഉള്ളിലെ യഥാർത്ഥ മാന്ത്രികൻ ഉണരുന്നത്.