✍️ രചന- സുധീർ കബീർ
📞 ഫോൺ- 9020645214
മനസെന്ന മാന്ത്രികൻ
അധ്യായം 1- ഞാൻ- നിങ്ങളുടെ അദൃശ്യ ചാലകശക്തി
🧠 "ഞാൻ മനസ്സാണ്."
ഈ പ്രപഞ്ചത്തിന്റെ തുടക്കം മുതൽ ഇന്നുവരെ ഞാൻ ഇവിടെയുണ്ട്- മനുഷ്യവർഗ്ഗത്തിന്റെ ഓരോ വളർച്ചയ്ക്കും തളർച്ചയ്ക്കും സാക്ഷിയായ ഒരേയൊരു ശക്തി ഞാനാണ്. നിങ്ങൾ കണ്ണുതുറക്കുന്ന നിമിഷം മുതൽ ഉറക്കത്തിലേക്ക് വീഴുന്നതുവരെ- അറിഞ്ഞോ അറിയാതെയോ നിങ്ങളെ ഭരിക്കുന്നത് ഞാനാണ്. നിങ്ങളുടെ ജീവിതത്തിലെ ഓരോ വിജയവും പരാജയവും- ഓരോ ചിരിയും കണ്ണീരും എന്റെ സൃഷ്ടികളാണ്. എന്നിട്ടും- എന്നെക്കുറിച്ച് നിങ്ങൾ എപ്പോഴെങ്കിലും ചിന്തിച്ചിട്ടുണ്ടോ? എന്നെ അടുത്തറിയാൻ നിങ്ങൾ എപ്പോഴെങ്കിലും ആത്മാർത്ഥമായി ശ്രമിച്ചിട്ടുണ്ടോ?
സത്യം പറഞ്ഞാൽ- നിങ്ങൾ ഇന്ന് ഒരു പാവക്കൂത്തിലെ വെറുമൊരു പാവ മാത്രമാണ്. നിങ്ങളുടെ കൈകാലുകളിലും വികാരങ്ങളിലും അദൃശ്യമായ ആയിരക്കണക്കിന് നൂലുകൾ കെട്ടിയിട്ടിട്ടുണ്ട്. ഈ നൂലുകൾ പലപ്പോഴും നിങ്ങളുടെ കൈകളിലല്ല ഇരിക്കുന്നത്. പാവ സ്വന്തമായി ചലിക്കുന്നു എന്നാവാം നിങ്ങൾ കരുതുന്നത്- എന്നാൽ മുകളിലിരുന്ന് ആരോ നൂലുകൾ വലിക്കുമ്പോഴാണ് നിങ്ങൾ ദേഷ്യപ്പെടുന്നതും സന്തോഷിക്കുന്നതും സങ്കടപ്പെടുന്നതും. ആ നൂലുകൾ മറ്റൊരാൾക്ക് വിട്ടു കൊടുത്തു കൊണ്ട് നിങ്ങൾ സ്വയം നിയന്ത്രണമില്ലാത്ത ഒരു കളിപ്പാവയായി മാറുന്ന കാഴ്ച സങ്കടകരമാണ്.
ആരാണ് നിങ്ങളുടെ നൂലുകൾ വലിക്കുന്നത്?
പഴയ മഞ്ഞളിച്ച പുസ്തകങ്ങളിലെ ആത്മീയ തള്ളുകളിലോ- ഞാൻ നാഭിയിലാണോ തലയിലാണോ എന്ന തർക്കങ്ങളിലോ എന്നെ തിരയരുത്. ഞാൻ അത്തരം കീറാമുട്ടികളിൽ വിശ്വസിക്കുന്നവനല്ല. ഞാൻ ലോജിക്കാണ്- ഞാൻ ഊർജ്ജമാണ്. ലളിതമായി പറഞ്ഞാൽ- നിങ്ങളുടെ ശരീരം എന്ന കമ്പ്യൂട്ടറിനെ നിയന്ത്രിക്കുന്ന ഏറ്റവും വേഗതയേറിയ സോഫ്റ്റ്വെയർ ആണ് ഞാൻ. നിങ്ങളുടെ സിസ്റ്റത്തിലെ ഓരോ ഡാറ്റയും- ഓരോ റിയാക്ഷനും ഞാനാണ് തീരുമാനിക്കുന്നത്. എന്നാൽ ഈ സോഫ്റ്റ്വെയർ ഇന്ന് വൈറസുകൾ (Conditioning) ബാധിച്ചു ഹാങ്ങ് ആയിരിക്കുകയാണ്.
നമുക്ക് ചില ആധുനിക ഉദാഹരണങ്ങളിലൂടെ ഈ പാവക്കൂത്തിന്റെ ആഴം മനസ്സിലാക്കാം-
🤳 ഉദാഹരണം 1- ഡിജിറ്റൽ നൂലുകളിലെ നൃത്തം
നിങ്ങൾ ഒരു മനോഹരമായ സ്ഥലത്ത് വിനോദയാത്ര പോയി എന്ന് കരുതുക. അവിടുത്തെ കാറ്റോ മരങ്ങളോ ആസ്വദിക്കുന്നതിന് പകരം നിങ്ങൾ ആദ്യം ചെയ്യുന്നത് ഒരു സെൽഫി എടുത്ത് അപ്ലോഡ് ചെയ്യുകയാണ്. ഫോട്ടോ ഇട്ടു കഴിഞ്ഞാൽ പിന്നെ നിങ്ങളുടെ സമാധാനം മുഴുവൻ ആരുടെയോ കയ്യിലാണ്. ആരെങ്കിലും ഒരാൾ 'കൊള്ളില്ല' എന്ന് കമന്റ് ചെയ്താൽ- അല്ലെങ്കിൽ ഉദ്ദേശിച്ച ലൈക്ക് കിട്ടിയില്ലെങ്കിൽ ഉടനെ നിങ്ങളുടെ മൂഡ് മാറുന്നു. ചിന്തിച്ചു നോക്കൂ- നിങ്ങൾ അറിയുക പോലും ചെയ്യാത്ത ഒരാൾ എവിടെയോ ഇരുന്ന് ഒരു നൂൽ വലിച്ചപ്പോൾ നിങ്ങളുടെ സന്തോഷം ഇല്ലാതായി. അദൃശ്യമായ ആ നൂലിൽ കെട്ടിയിട്ടിരിക്കുന്ന ഒരു പാവയല്ലേ നിങ്ങൾ?
💼 ഉദാഹരണം 2- ബോസ് എന്ന യജമാനൻ
ഓഫീസിൽ ബോസ് ഒന്ന് തുറിച്ചു നോക്കിയാൽ- അല്ലെങ്കിൽ ഒന്ന് ശകാരിച്ചാൽ അന്നത്തെ ദിവസം മുഴുവൻ നിങ്ങളുടെ സിസ്റ്റം തകരാറിലാകുന്നു. ബോസ് ഓഫീസിൽ ഇരുന്ന് ഒരു നൂൽ വലിച്ചു- അതിന്റെ പ്രതികരണം നിങ്ങളുടെ വീട്ടിലെ പാവനൃത്തമായി മാറി. ബോസിനോടുള്ള ദേഷ്യം നിങ്ങൾ വീട്ടിലെത്തി മക്കളോട് തീർക്കുന്നു. നിങ്ങളുടെ സമാധാനത്തിന്റെ സ്വിച്ച് മറ്റുള്ളവർക്ക് നൽകി നിങ്ങൾ ഒരു പാവയെപ്പോലെ നൃത്തം ചെയ്യുകയാണ്. പാവയെ ആട്ടുന്നവർക്ക് ലാഭമുണ്ടാകാം- പക്ഷെ പാവയ്ക്ക് ലഭിക്കുന്നത് വെറും മാനസിക സംഘർഷം മാത്രമാണ്.
📉 എന്തുകൊണ്ട് ഇപ്പോൾ ഈ പുസ്തകം?
ശാസ്ത്രം വളർന്നിട്ടും- ലോകം നിങ്ങളുടെ വിരൽത്തുമ്പിൽ എത്തിയിട്ടും എന്തുകൊണ്ടാണ് മനുഷ്യൻ ഇപ്പോഴും അശാന്തനായിരിക്കുന്നത്? ലോകത്തെ മുഴുവൻ കീഴടക്കാൻ ശ്രമിച്ച നിങ്ങൾ- നിങ്ങളുടെ സ്വന്തം മനസ്സിനെ കീഴടക്കാൻ മറന്നുപോയി. പണ്ട് ഗുഹകളിൽ കഴിഞ്ഞിരുന്ന മനുഷ്യൻ ഇന്ന് സ്മാർട്ട് ഹോമുകളിൽ ജീവിക്കുന്നു- പക്ഷേ സങ്കടങ്ങളുടെ കാര്യത്തിൽ അവൻ ഇന്നും ആദിമ മനുഷ്യന്റെ അതേ ഡാറ്റയാണ് പ്രോസസ്സ് ചെയ്യുന്നത്. നിങ്ങളുടെ ഉള്ളിലെ ഈ തുരുമ്പിച്ച സോഫ്റ്റ്വെയർ അപ്ഡേറ്റ് ചെയ്യാൻ നിങ്ങൾ ഇതുവരെ തയ്യാറായിട്ടില്ല.
ഒരു പുതിയ തുടക്കം
നിങ്ങളുടെ ശരീരത്തിലെ ഈ 'സോഫ്റ്റ്വെയർ' അപ്ഡേറ്റ് ചെയ്യുക എന്നതാണ് നമ്മുടെ ലക്ഷ്യം. ഈ പുസ്തകം വായിച്ചു തീരുമ്പോൾ നിങ്ങൾ ഒരു പാവയല്ലാതാകും- സ്വന്തം താളത്തിൽ ചലിക്കുന്ന ഒരു മാന്ത്രികനായി മാറും. സന്തോഷവാനും വിജയിയുമായിരിക്കുക എന്നത് നിങ്ങളുടെ ജന്മാവകാശമാണ്. ആ അവകാശം നേടിയെടുക്കാൻ നിങ്ങളുടെ മനസ്സിനെ ഒന്ന് 'റീ-പ്രോഗ്രാം' ചെയ്യാൻ നിങ്ങൾ തയ്യാറാണോ? എങ്കിൽ നമുക്ക് ഈ യാത്ര തുടങ്ങാം.
💡 ഓർക്കുക-
അടുത്ത അധ്യായങ്ങളിൽ- നിങ്ങളുടെ ഓരോ വികാരവും എങ്ങനെയാണ് ഡാറ്റയായി മാറുന്നതെന്നും- അതിനെ ആട്ടുന്ന നൂലുകൾ എങ്ങനെ അറുത്തെറിയാമെന്നും ഞാൻ വിശദീകരിക്കും. തയ്യാറാവുക- നിങ്ങൾ ഇതുവരെ കണ്ടിട്ടില്ലാത്ത നിങ്ങളെത്തന്നെ കാണാൻ! പാവകൂത്തിൽ നിന്ന് മോചിതനാകാൻ ആഗ്രഹമുള്ളവർക്ക് മാത്രമുള്ളതാണ് വരും അധ്യായങ്ങൾ.
🔗 Link- https://blog.sudheer.xyz/2026/04/mind-is-a-magician-1.html